राज्यात 2026 हे महिला शेतकरी वर्ष म्हणून घोषित करण्यात आले असून महिलांना विविध कृषी योजनांचा जास्तीत जास्त लाभ मिळावा यासाठी शासनाकडून प्रयत्न सुरू आहेत. त्याच पार्श्वभूमीवर नानाजी देशमुख कृषी संजीवनी प्रकल्प (पोकरा योजना) अंतर्गत महिला बचत गटांना अवजार बँक स्थापन करण्यासाठी अर्ज मागविण्यात आले आहेत.
राज्यातील 21 जिल्ह्यांतील 7201 पेक्षा अधिक गावांमध्ये हा प्रकल्प राबविला जात असून “गाव तिथे अवजार बँक” या संकल्पनेअंतर्गत पोकरा अंतर्गत असलेल्या गावांतील महिला बचत गटांना प्राधान्य देण्यात येणार आहे.
60% पर्यंत अनुदान
या योजनेअंतर्गत अवजार बँक स्थापनेसाठी एकूण प्रकल्प खर्चाच्या 60% पर्यंत अनुदान देण्यात येणार आहे. मात्र हे अनुदान कमाल 24 लाख रुपयांपर्यंत मर्यादित असेल.
अनुदानाचे उदाहरण :
- 10 लाख रुपयांचा प्रकल्प – 6 लाख रुपये अनुदान
- 20 लाख रुपयांचा प्रकल्प – 12 लाख रुपये अनुदान
- 50 लाख रुपयांचा प्रकल्प – जास्तीत जास्त 24 लाख रुपये अनुदान
कोण अर्ज करू शकतात?
- महाराष्ट्रातील महिला बचत गट
- शेतकरी महिलांचा समावेश असलेले गट
- पोकरा अंतर्गत असलेल्या गावांमधील बचत गटांना प्राधान्य
अर्ज प्रक्रिया
या योजनेसाठी अर्ज करण्यासाठी सर्वप्रथम NDKSP पोर्टलवर बचत गटाची नोंदणी करणे आवश्यक आहे. नोंदणी झाल्यानंतर बचत गटाच्या लॉगिनद्वारे अवजार बँक स्थापनेसाठी अर्ज करता येतो.
अर्ज प्रक्रियेसाठी आवश्यक कागदपत्रे मिळविण्यासाठी संबंधित तालुका प्रवर्तक किंवा समन्वयकांशी संपर्क साधावा, असे आवाहन करण्यात आले आहे.
अर्जाची अंतिम तारीख
या योजनेसाठी अर्ज करण्याची अंतिम तारीख 5 एप्रिल 2026 निश्चित करण्यात आली आहे. या तारखेपर्यंत अर्ज केलेल्या व पात्र ठरलेल्या बचत गटांना अनुदानाचा लाभ दिला जाणार आहे.
महिला शेतकऱ्यांना सक्षम करण्यासाठी आणि शेतीतील यांत्रिकीकरण वाढवण्यासाठी ही योजना महत्त्वाची मानली जात आहे. इच्छुक महिला बचत गटांनी वेळेत अर्ज करून या योजनेचा लाभ घ्यावा, असे आवाहन करण्यात आले आहे.