राज्यात महाडीबीटी अनुदानाच्या प्रतीक्षेत असलेल्या शेतकऱ्यांसाठी दिलासादायक अपडेट समोर आला आहे. राज्य शासनाच्या माध्यमातून राज्य पुरस्कृत कृषी यंत्रीकरण योजनेसाठी 50 कोटी रुपयांचा निधी वितरित करण्यास 23 जानेवारी 2026 रोजी मंजुरी देण्यात आली आहे.
राज्यात कृषी यंत्रीकरणासाठी मोठ्या प्रमाणावर शेतकऱ्यांनी अर्ज केले आहेत. अनेक शेतकऱ्यांना पूर्वसंमती देण्यात येऊन त्यांनी यंत्र–अवजारे खरेदी केली असून, बिल-चलान अपलोड करून अनुदानाच्या प्रतीक्षेत होते. मात्र, गेल्या अनेक दिवसांपासून अनुदान वितरण रखडले होते.
2025-26 या आर्थिक वर्षासाठी या योजनेसाठी एकूण 400 कोटी रुपयांची तरतूद करण्यात आली होती. यापैकी यापूर्वीच 200 कोटी रुपयांचे अनुदान वितरित करण्यात आले आहे. उर्वरित 200 कोटी रुपयांच्या निधीसाठी कृषी विभागाने मागणी केली होती. त्यामधीलच पहिल्या टप्प्यात 50 कोटी रुपयांचा निधी वित्त विभागाने मंजूर केला असून, आता हा निधी वितरणासाठी उपलब्ध झाला आहे.
या निधीमधून बिल-चलान अपलोड करून प्रतीक्षेत असलेल्या आणि प्राधान्यक्रमात असलेल्या लाभार्थ्यांना आधी अनुदान वितरित केले जाणार असल्याची माहिती आहे. मात्र, पात्र लाभार्थ्यांची संख्या मोठी आणि उपलब्ध निधी तुलनेने कमी असल्याने उर्वरित शेतकऱ्यांना आणखी काही काळ प्रतीक्षा करावी लागणार आहे.
कृषी यंत्रीकरण योजना शेतकऱ्यांमध्ये अत्यंत लोकप्रिय असून, लाखो शेतकऱ्यांनी या योजनेअंतर्गत अर्ज केले आहेत. पुढील टप्प्यात उर्वरित निधीबाबत निर्णय झाल्यास त्याचा लाभ आणखी शेतकऱ्यांना मिळण्याची अपेक्षा आहे.
या योजनेबाबत किंवा इतर महत्त्वाच्या अपडेट्ससाठी पुढील माहिती लवकरच अपेक्षित आहे.