राज्यातील लाडक्या बहिणींसाठी आनंदाची बातमी आहे. मुख्यमंत्री माझी लाडकी बहीण योजना अंतर्गत फेब्रुवारी आणि मार्च महिन्याचा डबल हप्ता (₹3000) थेट महिलांच्या बँक खात्यात जमा होण्यास सुरुवात झाली आहे. होळी आणि महिला दिनाच्या पार्श्वभूमीवर ही मोठी भेट सरकारकडून देण्यात आली आहे.
महिला व बालविकास मंत्री अदिती तटकरे यांनी याबाबत माहिती देताना सांगितले की, राज्यातील सुमारे 2 कोटी 52 लाख महिलांना दरमहा या योजनेचा लाभ दिला जात असून, 2025-26 या आर्थिक वर्षासाठी सुमारे 36 हजार कोटी रुपयांची तरतूद करण्यात आली आहे.
8 मार्चपर्यंत हप्ता वितरण
फेब्रुवारी महिन्यातील तांत्रिक अडचणींमुळे रखडलेला हप्ता आणि मार्च महिन्याचा हप्ता एकत्रितपणे देण्याचा निर्णय घेण्यात आला आहे. ही प्रक्रिया होळीपासून सुरू होऊन 8 मार्च (महिला दिन) पर्यंत पूर्ण केली जाणार आहे. ज्या लाभार्थ्यांच्या खात्यात या कालावधीत रक्कम जमा होणार नाही, त्यांनी हेल्पलाईन क्रमांक 181 वर संपर्क साधावा, असे आवाहन सरकारकडून करण्यात आले आहे.
डबल हप्त्यासाठी दोन अनिवार्य अटी
सरकारने यावेळी काही महत्त्वाच्या अटी लागू केल्या आहेत.
- जानेवारी महिन्याचा 19वा हप्ता (₹1500) लाभार्थीच्या खात्यात जमा झालेला असणे आवश्यक.
- रेशन कार्ड ई-केवायसी पूर्ण असणे बंधनकारक.
या अटी पूर्ण न करणाऱ्या महिलांना फेब्रुवारी-मार्चचा डबल हप्ता तसेच पुढील हप्ते मिळणार नाहीत. याशिवाय सुमारे 20 लाख महिलांना अपात्र ठरवण्यात आले असून, त्यांची यादी अधिकृत संकेतस्थळावर प्रसिद्ध करण्यात आली आहे.
आज 12 जिल्ह्यांत हप्ता वितरण
पहिल्या टप्प्यात राज्यातील 12 जिल्ह्यांमध्ये डीबीटी (Direct Benefit Transfer) द्वारे रक्कम वर्ग करण्यात येत आहे.
- पुणे विभाग: सातारा, सांगली
- नाशिक विभाग: धुळे, नंदुरबार
- नागपूर विभाग: वर्धा, भंडारा
- कोकण विभाग: मुंबई शहर/उपनगर, ठाणे
- मराठवाडा (छत्रपती संभाजीनगर विभाग): बीड, जालना
उर्वरित पात्र महिलांच्या खात्यात पुढील चार ते पाच दिवसांत रक्कम जमा केली जाणार आहे.
सरकारची भूमिका
ही योजना महायुती सरकारची महत्त्वाकांक्षी योजना असून, मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या नेतृत्वाखाली ही योजना पुढेही सातत्याने राबवली जाणार असल्याचे सरकारकडून स्पष्ट करण्यात आले आहे.