देऊळगाव कोळ (ता. सिंदखेड राजा) : जिल्ह्याच्या सहकार क्षेत्राला दिशा देणारे आणि असंख्य शेतकऱ्यांच्या जीवनात परिवर्तन घडवणारे सहकारमहर्षी भास्करराव शिंगणे यांच्या ३३व्या पुण्यतिथीनिमित्त शनिवार, दिनांक ११ ऑक्टोबर २०२५ रोजी भव्य स्मृतीज्योतीचे सश्रद्ध आयोजन करण्यात आले. त्यांच्या कर्तृत्वाला वंदन करण्यासाठी जिल्ह्याच्या कानाकोपऱ्यातून भाविक आणि ग्रामस्थ मोठ्या संख्येने उपस्थित राहिले.
१९९२ साली ११ ऑक्टोबर रोजी सहकारमहर्षी भास्करराव शिंगणे अनंतात विलीन झाले. मातृतीर्थ सिंदखेड राजा विधानसभा मतदारसंघाचे माजी आमदार, बुलढाणा जिल्हा केंद्रिय सहकारी बँकेचे माजी अध्यक्ष आणि राज्याच्या सहकार क्षेत्रातील एक उत्तुंग व्यक्तिमत्व म्हणून त्यांनी आपला ठसा उमटवला. सहकाराचा पाया मजबूत करत त्यांनी जिल्ह्याच्या विकासाची गंगोत्री वाहती ठेवली. त्यांच्या स्मृतीचा दीप चिरंतन तेवत ठेवण्यासाठी प्रत्येक वर्षी स्मृतीज्योतीचे आयोजन केले जाते.
या वर्षीची स्मृतीज्योत वर्ष ५ वे भव्य आयोजन म्हणून साजरी करण्यात आली. सकाळी सहकारमहर्षी भास्करराव शिंगणे साहेब यांच्या प्रतिमेचे पूजन करून स्मृतीज्योती प्रज्वलित करण्यात आली. ज्योतीला गावोगावी फिरवत सर्व ग्रामस्थांनी श्रद्धांजली अर्पण केली.
कार्यक्रमाच्या वेळी श्री. राजूभाऊ गायकवाड (मा. सरपंच, देऊळगाव कोळ), वैभव सखाराम गायकवाड, सुजित गायकवाड, शुभम गायकवाड, श्री. सुभाष गायकवाड, श्री. अशोक गायकवाड, श्री. कचरू गायकवाड, श्रीराम गायकवाड, भीमराव गायकवाड, प्रल्हाद गायकवाड, रामकिसन गायकवाड, सोनू बनकर, भोकरे अण्णा तसेच इतर सर्व ग्रामस्थ मोठ्या संख्येने उपस्थित होते.
स्मृतीज्योतीचे पूजन करून विनम्र अभिवादन करण्यात आले. ज्योतीचे मार्गक्रमण देऊळगाव कोळ येथून सुरू झाले आणि झोटिंगा, आगेफळ, शेंदुर्जन, दरेगाव, मेरा चिखली मार्गे होत बुलढाणा येथील समाधीस्थळी पोहोचले. या प्रवासात ग्रामस्थ, कार्यकर्ते आणि तरुण मंडळींनी मोठ्या उत्साहाने सहभाग घेतला.
झोटिंगा आगेफळ हनवत खेड फाटा येथे विनायकभाऊ राठोड (नेते, राष्ट्रवादी काँग्रेस शरद पवार गट) यांनी ज्योतीचे पूजन करून प्रतिमेला हार अर्पण केला. त्यांनी या वेळी बोलताना सांगितले की, “भास्करराव शिंगणे यांनी सहकार क्षेत्राला जो नवा आयाम दिला, तो आजही आदर्श ठरतो. त्यांचे कार्यच खरे प्रेरणास्थान आहे.”
शेंदुर्जन येथे देखील ग्रामस्थांच्या उपस्थितीत प्रतिमेचे पूजन करण्यात आले. स्मृतीज्योतीचा मार्ग ज्या गावांतून गेला, तिथे भाविकांनी फुलांनी सजवलेल्या रांगोळ्या, आरती आणि दीप प्रज्वलन करून स्वागत केले. या स्मृतीप्रवासाने संपूर्ण परिसर भावनांनी भारावून गेला होता.
कार्यक्रमाचे आयोजन ग्रामस्थांच्या स्वयंसेवी सहभागातून करण्यात आले होते. ग्रामपंचायत, युवक मंडळे आणि स्थानिक सामाजिक संघटनांनी या निमित्ताने विविध उपक्रम राबवले. ठिकठिकाणी स्वच्छता मोहीम, वृक्षारोपण आणि रक्तदान शिबिरे घेऊन या पुण्यतिथीला लोककल्याणाचा उत्सवाचे रूप देण्यात आले.
स्मृतीज्योती बुलढाणा येथे समाधीस्थळी पोहोचताच सर्व उपस्थितांनी दोन मिनिटे मौन पाळून श्रद्धांजली अर्पण केली. वातावरणात भक्ति आणि कृतज्ञतेचा सुर ओतप्रोत होता.
सहकारमहर्षी भास्करराव शिंगणे यांच्या स्मृतीने पुन्हा एकदा जिल्ह्याच्या सहकार क्षेत्रातील नवी उर्जा जागवली. ग्रामस्थ आणि सहकारप्रेमींच्या हृदयात त्यांची आठवण आजही चिरंतन तेवत आहे. त्यांच्या विचारांची ज्योत अशीच अखंड प्रज्वलित राहो, अशी सर्वांनी प्रार्थना केली.
